English | Armenian | Chinese (Simplified) | Chinese (Traditional) | Hindi | Hmong | Khmer | Korean | Lao | Punjabi | Russian | Spanish | Tagalog | Thai | Vietnamese

ទាំងនេះគឺជាចម្លើយចំពោះសំណួរដែល CalVCB ទទួលបានញឹកញាប់បំផុត។

ត្រូវការចម្លើយដែលអ្នកមិនឃើញនៅទីនេះឬទេ? ទាក់ទងយើងខ្ញុំតាមលេខ 800-777-9229 ឬ info@victims.ca.gov ។

នៅលើទំព័រនេះ៖

• លក្ខណសម្បត្តិ
• ការចំណាយ
• ការដាក់ពាក្យសុំ
• បណ្តឹងតវ៉ា

លក្ខណសម្បត្តិ

តើនរណាមានលក្ខណសម្បត្តិ?

ដើម្បីមានលក្ខណសម្បត្តិក្នុងការទទួលបានសំណង ជនរងគ្រោះត្រូវតែជា៖

• អ្នករស់នៅក្នុងរដ្ឋកាលីហ្វ័រញ៉ានៅពេលមានបទល្មើស ឬ
• ជនរងគ្រោះមិនមែនជាអ្នករស់នៅក្នុងរដ្ឋកាលីហ្វ័រញ៉ា។

បទល្មើសត្រូវតែពាក់ព័ន្ធនឹង៖

• របួសរាងកាយ
• ការគំរាមកំហែងបង្ករបួសស្នាមលើរាងកាយ
• មរណភាព ឬ
• របួសផ្លូវចិត្ត ក្នុងករណីមួយចំនួន។

ជនរងគ្រោះត្រូវ៖

• សហការជាមួយប៉ូលីស និងមន្ត្រីតុលាការ ដើម្បីចាប់ខ្លួន និងកាត់ទោសជនល្មើស។ អាចលើកលែងចំពោះបទល្មើសដែលពាក់ព័ន្ធនឹងអំពើហិង្សាក្នុងគ្រួសារ ការជួញដូរមនុស្ស ឬការបំពានផ្លូវភេទ។
• សហការជាមួយបុគ្គលិក CalVCB ។
• មិនពាក់ព័ន្ធនឹងព្រឹត្តិការណ៍ដែលបណ្ដាលឲ្យមានបទល្មើស។
• មិនបានប្រព្រឹត្តបទឧក្រិដ្ឋនៅពេលមានបទល្មើស។
• ដាក់ពាក្យស្នើសុំក្នុងរយៈពេលកំណត់។ ជនរងគ្រោះអាចដាក់ពាក្យស្នើសុំក្នុងរយៈពេលប្រាំពីរឆ្នាំបន្ទាប់ពីមានបទ​ល្មើស ឬប្រាំពីរឆ្នាំបន្ទាប់ពីជនរងគ្រោះបានដឹង ឬរកឃើញថារបួស ឬមរណភាពបានកើតឡើងដោយសារបទល្មើសនេះ។ ជនរងគ្រោះដែលមានអាយុ 21 ឆ្នាំ ឬក្មេងជាងនេះមានរយៈពេលរហូតឈានដល់ខួបកំណើត អាយុ 28 ឆ្នាំដើម្បីដាក់ពាក្យស្នើសុំ។

តើ CalVCB រ៉ាប់រងលើបទល្មើសអ្វីខ្លះ?

បទល្មើសដែលរ៉ាប់រងដោយ CalVCB មានជាអាទិ៍៖

• ការវាយប្រហារដោយអាវុធដែលគ្រោះថ្នាក់ដល់ជីវិត
• ការវាយដំ
• ការចាប់ពង្រត់កុមារ
• ការបំពានលើកុមារ
• ការបោះបង់ និងបង្កគ្រោះថ្នាក់ដល់កុមារ
• ការបំពានភផ្លូវភេទលើកុមារ
• ការគំរាមកំហែង
• អំពើហឹង្សាក្នុងគ្រួសារ
• ការបើកបរក្រោមឥទ្ធិពលសារ​ធាតុ/គ្រឿងស្រវឹង
• ការបំពានមនុស្សចាស់
• បទល្មើស​រើស​អើង
• បុកហើយរត់
• មនុស្សឃាត
• ការជួញដូរមនុស្ស
• ការចាប់ជំរិត
• ឃាតកម្ម
• ការធ្វេសប្រហែស
• អំពើរំលោភសេពសន្ថវៈ
• អំពើប្លន់
• ការបំពានផ្លូវភេទ
• ការលូកលាន់ផ្លូវភេទ
• ការយារយីតាមអនឡាញ ឬដោយផ្ទាល់
• មនុស្សឃាតអចេតនា​ដោយប្រើយានយន្ត
• បទល្មើសផ្សេងទៀតដែលបណ្តាលឱ្យមានរបួសរាងកាយ ឬការគំរាមកំហែងបង្ករបួសរាងកាយដល់ជនរងគ្រោះ

ចុះបើបទល្មើសបានកើតឡើងនៅក្រៅរដ្ឋកាលីហ្វ័រញ៉ា?

ជនរងគ្រោះគួរតែដាក់ពាក្យស្នើ​សុំសំណងជនរងគ្រោះនៅក្នុងរដ្ឋដែលបទល្មើសបានកើតឡើង បន្ថែម​ពីលើការ​ដាក់ពាក្យសុំមក CalVCB ។ CalVCB នឹងផ្ទៀងផ្ទាត់ពាក្យស្នើសុំនៅក្រៅរដ្ឋ។ ប្រសិនបើការចំណាយរបស់ជនរងគ្រោះមិនត្រូវបានរ៉ាប់រងដោយកម្មវិធីនោះ CalVCB ប្រហែលជាអាចជួយបាន។

ចុះបើខ្ញុំត្រូវការជំនួយហិរញ្ញវត្ថុភ្លាមៗ?

អ្នកអាចស្នើសុំជំនួយគ្រាអាសន្នក្នុងស្ថានភាពមួយចំនួន។ CalVCB អាចអនុម័តជំនួយបន្ទាន់ដោយផ្អែកលើកម្រិតនៃការលំបាក និងតម្រូវការ។ កត់ត្រាតម្រូវការនេះនៅលើពាក្យសុំរបស់អ្នកនៅក្នុងផ្នែកផ្តល់ជំនួយគ្រាអាសន្ន ហើយដាក់វិក្កយបត្រមកជាមួយនឹងពាក្យសុំរបស់អ្នក។

ការចំណាយ

តើការចំណាយអ្វីខ្លះដែលមានលក្ខណសម្បត្តិទទួលបានសំណង?

• ពិធីបុណ្យសព និងការបញ្ចុះសព
• ការព្យាបាលវេជ្ជសាស្រ្ត និងធ្មេញ
• ការព្យាបាល ឬប្រឹក្សាសុខភាពផ្លូវចិត្ត
• ការប្រឹក្សាសុខភាពផ្លូវចិត្តសម្រាប់អនីតិជនដែលបានឃើញបទល្មើសហឹង្សា
• ការចំណាយលើការធ្វើដំណើរទៅមក សម្រាប់ការណាត់ជួបវេជ្ជសាស្រ្ត ទន្តពេទ្យ ឬសុខភាពផ្លូវចិត្ត
• ថ្លៃពេទ្យសត្វ ឬការចំណាយលើការប្ដូរសុនខនាំផ្លូវ ផ្ដល់សញ្ញា និងបម្រើ
• ការបាត់បង់ប្រាក់ចំណូលរហូតដល់ 30 ថ្ងៃសម្រាប់ឪពុកម្តាយ ឬអាណាព្យាបាលតាមផ្លូវច្បាប់របស់ជនរងគ្រោះដែលជាអនីតិជនដែលកំពុងសម្រាកព្យាបាលនៅមន្ទីរពេទ្យ ស្លាប់បាត់បង់ជីវិត
• ការបាត់បង់ប្រាក់ចំណូលប្រសិនបើជនរងគ្រោះធ្លាក់ខ្លួនពិការដោយសារបទល្មើសផ្ទាល់។ ជនរងគ្រោះអាចទទួលបានអត្ថប្រយោជន៍នេះរហូតដល់ប្រាំឆ្នាំបន្ទាប់ពីកាលបរិច្ឆេទដែលបទល្មើសបានកើតឡើង។ ប្រសិនបើជនរងគ្រោះពិការជាអចិន្ត្រៃយ៍ ការបាត់បង់ប្រាក់ចំណូលអាចទទួលបានអត្ថប្រយោជន៍លើសពីប្រាំឆ្នាំ។
• ការបាត់បង់ការឧបត្ថម្ភចំពោះអ្នកក្នុងបន្ទុកនៃជនរងគ្រោះដែលពិការ ឬស្លាប់បាត់បង់ជីវិតដោយសារបទល្មើសផ្ទាល់
• ការបាត់បង់ប្រាក់ចំណូលរហូតដល់ទៅពីរឆ្នាំ ប្រសិនបើបទល្មើសគឺការជួញដូរមនុស្ស
• ការបណ្តុះបណ្តាលការងារឡើងវិញ
• ការផ្លាស់ប្ដូរទីលំនៅ
• ការដំឡើង ឬកែលម្អសុវត្ថិភាពលំនៅឋាន
• ការកែផ្ទះ ឬយានយន្តសម្រាប់ជនរងគ្រោះដែលពិការជាអចិន្ត្រៃយ៍
• ការសម្អាតកន្លែងកើតមានបទល្មើស

តើការចំណាយអ្វីខ្លះដែលមិនមានលក្ខណសម្បត្តិទទួលបានសំណង?

ការចំណាយមួយចំនួនមិនត្រូវបានរ៉ាប់រងដោយ CalVCB ។ ឧទាហរណ៍ដូចជាការខូចខាតទ្រព្យសម្បត្តិ ថ្លៃសេវាតុលាការ និងថ្លៃសេវាផ្លូវច្បាប់។

អ្នកដាក់ពាក្យត្រូវស្នើសុំសំណងក្នុងរយៈពេលបីឆ្នាំបន្ទាប់ពីកាលបរិច្ឆេទផ្ដល់សេវា។ ប្រសិនបើវិក្កយបត្រត្រូវបានទទួលយឺតពេល នោះ CalVCB មិនអាចបង់សងបានទេ។

តើ CalVCB នឹងមិបើកប្រាក់សំណងនៅពេលណា?

CalVCB នឹងមិនបើកប្រាក់សំណងប្រសិនបើ៖

• ពាក្យស្នើសុំសំណងមិនត្រូវបានអនុម័តយល់ព្រម។
• អ្នកដាក់ពាក្យមិនបានដាក់ពាក្យស្នើសុំក្នុងរយៈពេលកំណត់។
• វិក្កយបត្រត្រូវបានដាក់ជូនដោយគ្មានឯកសារត្រឹមត្រូវ។
• ការចំណាយមិនត្រូវបានរ៉ាប់រងដោយកម្មវិធីនេះទេ។
• ការចំណាយលើសពីដែនកំណត់ចំណាយរបស់កម្មវិធី។
• ប្រភពសំណងដែលអាចមានផ្សេងទៀតមិនត្រូវបានប្រើប្រាស់។
• អ្នកផ្តល់សេវាស្នើសុំការបង់ប្រាក់ដោយផ្ទាល់ ប៉ុន្តែមិនបានចុះឈ្មោះជាមួយ CalVCB ទេ។

CalVCB មិនអាចបង់សងទេ ខណៈពេលដែលជនរងគ្រោះ៖

• ស្ថិតនៅក្នុងមន្ទីរកែប្រែ។
• ស្ថិតក្នុងស្ថានភាពនៃការដោះលែងមានលក្ខខណ្ឌ ការព្យួរទោស ឬការត្រួតពិនិត្យពីសហគមន៍ក្រោយការដោះលែងសម្រាប់បទឧក្រិដ្ឋហឹង្សា។
• តម្រូវឲ្យចុះឈ្មោះជាជនល្មើសផ្លូវភេទ។

តើដែនកំណត់លើសំណងមានអ្វីខ្លះ?

មានដែនកំណត់ចំពោះអ្វីដែល CalVCB អាចបង់បាន។

CalVCB ភាគច្រើនអាចបង់តាមពាក្យសុំដែលបានអនុម័តគឺ $ 70,000។ (សម្រាប់ពាក្យសុំដែលបានដាក់ពីឆ្នាំ 2001-2017 ចំនួនច្រើនបំផុត ដែល CalVCBអាចបង់គឺ $63,000។)

មានដែនកំណត់ចំពោះអ្វីដែល CalVCB អាចបង់បានសម្រាប់សេវាមួយចំនួន។ សូមមើលការណែនាំយោងអំពីអត្ថប្រយោជន៍សំណងសម្រាប់បញ្ជីពេញលេញ។

ចុះបើខ្ញុំទទួលបានសំណងពីប្រភពផ្សេង?

តាមច្បាប់ CalVCB អាចបង់តែចំពោះវិក្កយបត្រដែលមិនត្រូវបានរ៉ាប់រងដោយប្រភពផ្សេងទៀតប៉ុណ្ណោះ។ ប្រភពផ្សេងទាំងនេះរួមមាន៖

• ការធានារ៉ាប់រងផ្នែកវេជ្ជសាស្ត្រ ធ្មេញ ឬភ្នែក
• កម្មវិធីអត្ថប្រយោជន៍សាធារណៈដូចជា Medi-Cal ការធានារ៉ាប់រងលើការអត់ការងារ ឬអត្ថប្រយោជន៍ពិការភាព
• ការធានារ៉ាប់រងឯកជន (រថយន្ត ផ្ទះ និង/ឬអាយុជីវិត)
• អត្ថប្រយោជន៍សំណងរបស់បុគ្គលិក
• សំណងដែលបង្គាប់ដោយតុលាការ
• សំណងបណ្តឹងរដ្ឋប្បវេណី
• អត្ថប្រយោជន៍និយោជក

អ្នកដាក់ពាក្យសុំត្រូវតែប្រាប់ CalVCB អំពីប្រភពសំណងដែលអាចមានទាំងអស់។ នៅពេលក្រោយ ប្រសិនបើអ្នកដាក់ពាក្យសុំទទួលបានសំណងពីប្រភពទាំងនេះ អ្នកដាក់ពាក្យសុំត្រូវតែសង CalVCB វិញ។

ប្រាក់ Crowdfunding (ឧទាហរណ៍ GoFundMe) មិនត្រូវបានចាត់ទុកថាជាប្រភពសងវិញទេ ប៉ុន្តែ CalVCB មិនអាចបង់ថ្លៃចំណាយដែលបានបង់រួចហើយជាមួយនឹងការបរិច្ចាគពី crowdfunding នោះទេ។

តើខ្ញុំត្រូវបង់សង CalVCB វិញដែរឬទេ ប្រសិនបើប្រភពផ្សេងទៀតបង់?

បាទ/ចាស។ CalVCB អាចបង់តែថ្លៃចំណាយសម្រាប់ជនរងគ្រោះដែលមិនមានប្រភពសំណងផ្សេងទៀតប៉ុណ្ណោះ។ CalVCB មានសិទ្ធិទទួលបានសំណងវិញបន្ទាប់ពីបានធ្វើការទូទាត់សងប្រសិនបើប្រភពផ្សេងទៀតបង់សង។

ការដាក់ពាក្យសុំ

តើខ្ញុំដាក់ពាក្យស្នើសុំសំណងតាមរបៀបណា?

អ្នកអាចដាក់ពាក្យសុំតាមអនឡាញ តាមក្រដាសស្នាម ឬតាមរយៈជំនួយពីមេធាវី។

តើមានដែនកំណត់នៃពេលវេលាអ្វីខ្លះសម្រាប់ការដាក់ពាក្យស្នើសុំ?

ដែនកំណត់ពេលវេលាសម្រាប់ការដាក់ពាក្យសុំគឺ៖

• ក្នុងរយៈពេលប្រាំពីរឆ្នាំបន្ទាប់ពីមានបទល្មើស ឬ
• ប្រាំពីរឆ្នាំបន្ទាប់ពីជនរងគ្រោះជាអនីតិជនមានអាយុ 21 ឆ្នាំ ឬ
• ប្រាំពីរឆ្នាំចាប់ពីពេលដែលជនរងគ្រោះបានដឹង ឬអាចដឹងថារបួស ឬការស្លាប់បានកើតឡើងដោយសារតែបទល្មើសផ្ទាល់។

ពាក្យស្នើសុំមួយចំនួនដែលដាក់យឺតជាងនេះអាចត្រូវបានពិចារណា។ ដាក់ទម្រង់បែបបទពិចារណាយឺត ប្រសិនបើមានករណីនោះកើតឡើង។ ថ្ងៃផុតកំណត់នៃការដាក់ពាក្យសុំអាចត្រូវបានពន្យារពេលប្រសិនបើមានហេតុផលសមស្រប។  នេះរួមមាន៖

• អនុសាសន៍ពីតំណាងអយ្យការ។ អនុសាសន៍នេះត្រូវបញ្ជាក់ថា ជនរងគ្រោះបានសហការក្នុងការចាប់ខ្លួន និងកាត់ទោសជនល្មើស។
• ព្រឹត្តិការណ៍នៅអំឡុងពេលកាត់ទោស ឬការផ្តន្ទាទោសជនល្មើសនាំឱ្យមានការខាតបង់បន្ថែមសម្រាប់ជនរងគ្រោះ។
• លក្ខណៈនៃបទល្មើសគឺថាការរាយការណ៍យឺតយ៉ាវអំពីបទល្មើសគឺសមហេតុផល និងអាចដោះសារបាន។

សមាជិកគ្រួសារដែលរងផលប៉ះពាល់ពីបទល្មើសតែមួយក៏អាចដាក់ពាក្យស្នើសុំបានដែរ។ ពាក្យសុំអាចត្រូវអនុម័តឯកភាពបន្ទាប់ពី CalVCB អនុម័តលើពាក្យសុំរបស់ជនរងគ្រោះ។

បណ្តឹងតវ៉ា

តើខ្ញុំមានសិទ្ធិប្តឹងតវ៉ាដែរឬទេ?

អ្នកមានសិទ្ធិប្តឹងតវ៉ា ប្រសិនបើ CalVCB បដិសេធចំពោះពាក្យសុំ ឬការទូទាត់សម្រាប់ការចំណាយ។ អ្នកត្រូវតែដាក់បណ្តឹងតវ៉ាក្នុងរយៈពេល 45 ថ្ងៃគិតចាប់ពីថ្ងៃដែលក្រុមប្រឹក្សាបានផ្ញើសេចក្តីជូនដំណឹងដើម្បីបដិសេធចំពោះពាក្យសុំ ឬការចំណាយ។

ប្រសិនបើអ្នកផ្តល់ព័ត៌មានថ្មី CalVCB អាចពិចារណាលើការបដិសេធនេះឡើងវិញ។ ប្រសិនបើបញ្ហាលើបណ្តឹងតវ៉ាមិនអាចដោះស្រាយបានទេ CalVCB នឹងផ្ញើលិខិតផ្លូវការមួយច្បាប់ជូនអ្នក ដែលដាក់បញ្ចូលនូវជម្រើសរបស់អ្នក។ សិទិ្ធនេះរួមមានការស្នើសុំសវនាការ។ CalVCB មិនរៀបចំសវនាការអំពីពីការបដិសេធចំពោះការផ្តល់ជំនួយគ្រាអាសន្នឡើយ។

ប្រសិនបើអ្នកមិនយល់ស្របចំពោះសេចក្ដីសម្រេចចុងក្រោយរបស់ក្រុមប្រឹក្សាទេ អ្នកអាចដាក់ញត្តិសុំដីកាសម្រេចនៅតុលាការជាន់ខ្ពស់រដ្ឋកាលីហ្វ័រញ៉ា។

តើខ្ញុំដាក់បណ្តឹងតវ៉ាតាមរបៀបណា?

អ្នកអាចប្រើទម្រង់បែបបទបណ្តឹង CalVCB ឬសរសេរជាលិខិត។ ពន្យល់ពីមូលហេតុដែល CalVCB គួរតែយល់ព្រមលើពាក្យសុំ ឬការចំណាយ។ ភ្ជាប់ជាមួយឯកសារគាំទ្រ។ បន្ទាប់មកចុះហត្ថលេខា ចុះកាលបរិច្ឆេទ និងផ្ញើទម្រង់បែបបទ ឬលិខិតនេះទៅ៖

CalVCB
Attn: Appeals
P.O. Box 350
Sacramento, CA 95812-0350

តើនីតិវិធីបណ្តឹងដំណើរការយ៉ាងដូចម្តេច?

CalVCB នឹងពិនិត្យមើលព័ត៌មានទាំងអស់នៅក្នុងឯកសាររបស់អ្នក។ ប្រសិនបើបញ្ហាលើបណ្តឹងមិនអាចដោះស្រាយបានទេ CalVCB នឹងផ្ញើជូនអ្នកនូវអនុសាសន៍របស់មន្ត្រីសវនាការ។ អនុសាសន៍នេះនឹងប្រាប់អ្នកអំពីជម្រើសសវនាការរបស់អ្នកជាលាយលក្ខណ៍អក្សរ។

• ប្រសិនបើអ្នកជ្រើសរើសយកសវនាការផ្ទាល់មាត់ អ្នកអាចជ្រើសរើសបង្ហាញខ្លួនតាមវិធីដូចខាងក្រោម៖
  • វីដេអូ ឬទូរសព្ទតាមរយៈ Zoom
  • ដោយផ្ទាល់នៅ Sacramento
• CalVCB នឹងជូនដំណឹងដល់អ្នកជាលាយលក្ខណ៍អក្សរអំពីថ្ងៃ និងពេលវេលានៃសវនាការរបស់អ្នក និងការណែនាំអំពីរបៀបបង្ហាញខ្លួន។
• ប្រសិនបើអ្នកចង់ឡើងសវនាការនៅថ្ងៃផ្សេង អ្នកត្រូវតែជម្រាប CalVCB ជាលាយលក្ខណ៍អក្សរ និងផ្តល់ហេតុផលសម្រាប់ការផ្លាស់ប្តូរនេះ។ អ្នកត្រូវតែបង្ហាញហេតុផលសមស្របដើម្បីប្តូរកាលបរិច្ឆេទសវនាការ។
• ប្រសិនបើអ្នកចង់ដាក់ឯកសារបន្ថែម៖
  • អ្នកនឹងមានពេល 30 ថ្ងៃដើម្បីផ្ញើឯកសារដែលបង្ហាញពីមូលហេតុដែល CalVCB គួរតែយល់ព្រមចំពោះពាក្យសុំ ឬការចំណាយ។
  • អ្នកមិនចាំបាច់ដាក់ឯកសារដែលអ្នកបានផ្តល់រួចហើយម្តងទៀតទេ។ ក្រុមប្រឹក្សានឹងពិចារណាឯកសារទាំងអស់នៅក្នុងសំណុំឯកសាររបស់អ្នក ហើយផ្ដល់ជូនអ្នកនូវសេចក្ដីសម្រេចចុងក្រោយជាលាយលក្ខណ៍អក្សរ។
• ប្រសិនបើអ្នកជ្រើសរើសមិនធ្វើអ្វីសោះ៖
  • អនុសាសន៍របស់មន្ត្រីសវនាការនឹងត្រូវបានទទួលយកដោយក្រុមប្រឹក្សាថាជាសេចក្ដីសម្រេចចុងក្រោយ។